［A酸篇］第一次睇醫生

我係中三開始就已經生暗瘡，到大學畢業出嚟做嘢而家皮膚已經好咗好多，不過仍然會keep住生暗瘡，主要集中係腮邊，黎M之前又會嚴重啲咁。

我嘅皮膚係混合性，外油內乾果種。以前一味用控油產品，依家就學識保濕既重要性。不過補極都好油，基本上lunch左右就要補粉同埋一日要洗一次頭。

市面上所有去痘嘅產品（死海泥、果酸、水楊酸、外用A酸、茶樹油、oxy)我基本上都用過晒。睇過西醫食抗生素同避孕藥對我來講效果都係暫時性，一停藥就復發。中藥都睇過幾次，時間實在太長喇，又有'排毒'反應，一個星期＄1000計返其實仲貴過西醫，真係唔知要睇到幾時。

生咗暗瘡咁多年又點會冇聽過A酸呢？😂 不嬲都知A酸可以斷尾，不過從來都冇諗住試，一來貴，二來副作用多。至到今次因為遲左黎M谷到成塊面都係石頭瘡，同埋眼見身邊的朋友食完之後由嚴重變到皮光肉滑，就決定試一試！

上網做左research就後，了解到副作用主要係：

1. 畸胎 （反正我冇男朋友）

2. 傷肝 （所以要keep住抽血驗肝）

3. 皮膚減少出油 （喂正呀呢個！不過後果係皮膚係變到好乾好乾，全身都好乾，個嘴會乾到裂，對眼可能帶唔到Con，個鼻乾到流血！可能會乾到有濕疹）

4. 心情低落，抑鬱（呢個我唔擔心呀，仲醫唔走d暗瘡先抑鬱呀）

我最後揀咗去睇旺角雅蘭中心嘅陳漢杰醫生，網民話佢寸但勝在價錢合理，耐心講解，地點方便。

一坐低佢就忙一忙我塊面，問我生左幾耐暗瘡，期間睇過啲咩醫生（中醫定西醫）開咩藥我食同埋效果如何。好詳細問我咁多年黎用過咩產品，咩類型既洗面，保濕用gel定cream😂同埋對痘痘既效果點樣。之後佢就講解下暗瘡既成因，同埋點解避孕藥同抗生素既效果冇A酸咁好，同埋A酸點樣幫助暗瘡皮膚。

A酸既好處大既係：

1. 減少皮膚分泌嘅油脂

2. 改變皮膚細胞結構 （呢個係抗生素同避孕藥做唔到嘅）

3. 減少暗瘡菌

4. 減少皮膚發炎嘅機會

醫生都有同我解釋A酸既副作用，最後我決定食A酸，因為真係想斷尾呀😂 陳醫生有原廠A酸同Oratane，成份一樣（原廠會靚啲）效果差唔多但價錢唔同（原廠$36/10mg; Oratane $25/10mg) 我揀咗Oratane,醫生最後開左10mg比我，一日兩次，十五日療程。因為驚會爆發所以叫醫生開埋抗生素比我，醫生話同兩個月都係爆發期。(第一次要比診金，兩星期抗生素連20mg x 14 days Oratane好似1200左右，第二次開始就因為胃痛唔食抗生素，兩星期Oratane 20mg $680）

臨走之前醫生幫我影左幾張相，我都問咗醫生化妝嘅問題。基本上可以唔化就唔好化啦，而醫生都話覆診化住妝黎都OK, 好彩！（之前睇過一個好惡既醫生，因為我化住妝黎睇佢，佢係咁鬧😂）不過第一次見最好素顏去見，等醫生清楚你既情況啦。

我而家塊面：